Статья на мокшанском языке.Тонафнесаськ мокшень кяльть. Автор Рыскина Н.П.

Оцюфне лац шарьхкодьсазь – кда шабась аф кармай содама эсь юронзон, культуранц, кяленц, эздонза стака ули касфтомс пара вайме, шачема ширень кельги ломань. Аф стак тяниень пингть оцю мяль шарфневи мокшень кяльть и культурать ванфтомаснонды-эреклафнемаснонды. Нилеце кизось покодян мокшень кялень учителькс Темникавонь 1-це № школаса. Пяк кельгса эсь тевозень, сяс эрь шиня сашендан шабатнень еткс пара мяльса. Пяк кельгса шачема-касома уженяньконь – Мордовиять, сонь мазыдонга-мазы перьфпяленц, ломанензон. И тя кельгомать старандан пачфтемс иттненди. Урокса лама азонкшнян мокшэрзятнень тяниень и ингольдень эряфснон-ащефснон, койснон- обуцяснон колга. Сидеста шабатнень мархта етафнетяма илат, коса синь няфнесазь мокшень кяльса содамошиснон, морсихть мокшень морот и сиде моронят, азонкшнихть стихотвореният, каванякшнесазь инжихнень танцти ярхцамбяльса. Школасонк ули краеведческяй музей. Тяса аф кржа кунардонь пингонь паршида: севонень сяканят, шуфтонь куцюфт, национальнай панарса щаф някат, сюреса серматф нардамат-месть. Штоба сяда лац содамс мокшэрзятнеь ингольдень эряфснон колга, минь сидеста якатама историко-краеведческяй музеи Ф.Ф. Ушаковонь лемса. Тостонь покодихне Зараев Н.Н., Изотиков Ю.Н. васфнесамазь пара мяльса, лама азонкшнихть мокшэрзятнень подвигснон и эряфснон колга. Шабатнень мархта лувонттама лама стихотворенияда, ефкста, азкста мокшень кяльса. Азонкшнян мокшэрзянь писательхнень творчестваснон колга. Кой-коста уленттяма инжикс Темниковскяй районнай идень библиотекаса, коса лямбоста васьфнесамазь тостонь покодихне Прошина Е.И., Кяшкина Т.П. Синь етафнихть иттнень мархта эсь лацонь пялькстомат, викторинат, презентацият. А сембода пяк шабатне кельгсазь мокшень ефксть «Куйгорож». Конац тонафтсыне иттнень улемс тевонь кельгикс, кельгомс эсь шачема-касома ширеснон. Мон пяк кеняртькшнян шабатнеь сатфксснонды и содамошиснонды. Нльне рузонь семьса кассы стирнятне-церанятне тонафнесазь мокшень кяльть. Сембось тя максы надияма, што ня иттнень эзда касыхть афкуксонь ломать, конат кармайхть кородозь малаткшнема семботи минценнети, национальнайти.

Рыскина Н.П. мокшень кялень тонафтысь Темниковскяй СОШ №1